Ոսկեվազ, Մուսկատ Ռոզալի

Բաց սաթագույն գինու անուշաբույր փունջն արտահայտված է վարդի թեյի և չամիչի հարուստ, վառ ու գրավիչ երանգներով: Հավասարակշռված համը բնութագրվում է յուղային տեքստուրայով: Երկարատև հետհամում նկատվում են մեղրի և սերկևիլի նոտաներ:

Խորհուրդ է տրվում օգտագործել որպես դիժեստիվ, լավ համադրվում է ֆուա գրայի, մրգերի և տարատեսակ աղանդերի հետ:

Այս լիկյորային գինու արտադրության համար օգտագործում են Էջմիածին քաղաքի մերձակայքում աճեցված Մուսկատ Վարդաբույր խաղողի սորտից, որի շնորհիվ էլ գինին ձեռք է բերում իր բաց ոսկեգույն երանգը, հարուստ բույրն ու գայթակղիչ համը: Բերքահավաքից հետո պտուղները սեղմվում ու խմորվում են, որոնց հաջորդում է հնացման գործընթացը:

Հնացվում է հայկական կաղնե տակառներում՝ 12 ամիս:

«Ոսկեվազի Գինու Գործարան»-ը գտնվում է Արագածոտնի մարզի նույնանուն գյուղում: Զարմանահրաշ գեղեցկությամբ օժտված Հայաստանում ամենաբարձր լեռան` Արագածի  մերձակայքը կրում է իր մեջ հայկական քաղաքակրթության զարգացման նախկին ժամանակաշրջանների շերտերը: Գործարանից ընդամենը մի քանի կիլոմետր հեռավորության վրա՝ Քասախի կիրճի եզրին, 5-7-րդ դարերում կառուցված «Բադալի Ժամ» եկեղեցու ավերակներն են: Մոտակայքում հայտնաբերվել են հողի մեջ թաղված կարասի մնացորդներ, որոնց մեջ գինի էին պահում:

Ոսկեվազ գինեգործարանը հիմնադրվել է դեռևս 1932 թվականին: Ժամանակակից բոլոր նորարարությունների հետ միասին այն զգուշորեն պահպանել է իր վավերական տարրերի մեծ մասը՝ ներառյալ շենքերը: Այսօր գործարանի տարածքում տարվում են բազմաթիվ շինարարական աշխատանքներ, որպեսզի ստեղծվի նոր, նմանը չունեցող, յուրօրինակ զբոսաշրջային համալիր: Գործարանն իր վերածնունդն ապրեց 2004 թվականին: Այսօր Ոսկեվազը ստեղծում է գինիներ, որոնք արտադրվում են ինչպես ժամանակակից գինեգործական մեթոդներով, այնպես էլ օգտագործելով հին ավանդական կարասները, որոնք ստեղծվել են դեռևս 19-րդ դարավերջին: Պարբերաբար բարելավելով և կատարելագործելով սեփական արտադրության որակը, ինչպես նաև յուրաքանչյուր տարի ընդլայնելով արտադրվող խմիչքի նմուշակազմը` «Ոսկեվազի Գինու Գործարան»-ը կատարում է իր յուրօրինակ ներդրումը գինիների աշխարհում: