Այս գինին դասական Գելբեր Մուսկատելերի հիանալի օրինակ է: Բույրը հարուստ է ցիտրուսային մրգերի, մեղրի, մանգոյի ու սերկևիլի նուրբ երանգներով: Քիմքին թարմ է, մաքուր՝ արտահայտիչ թթվայնությամբ և հարուստ մրգային երանգներով:

Գինին կատարյալ է որպես ապերիտիվ: Հիանալի է համադրվում նաև միջերկրածովյան խոհանոցի ճաշատեսակաների, օրինակ՝ մարինարա պիցցայի ու գասպաչոյի հետ։ 

Խաղողի այգիներում աշխատանքները կատարվում են հաշվի առնելով օրգանական խաղողագործության սկզբունքները` առանց թունաքիմիկատների օգտագործման։ Խմորումն ու նստվածքի վրա հնացումը տեղի են ունենում չժանգոտվող պողպատե պահամաններում:

Domane Wachau ընկերությունը գտնվում է Ավստրիայի ամենահայտնի գինեգործական շրջաններից մեկի՝ Վախաու հովտի հենց սրտում։ Այժմ ընկերությանն են պատկանում Վախաու հովտի խաղողի այգիների 30%-ը` ավելի քան 400 հա տարածք։ Գինեգործարանն արտադրում է տարբեր ոճերի՝ թեթև մրգայինից մինչև բարդ գինիներ, որոնք ունեն հնացման մեծ պոտենցիալ: